اسلام آباد (نیوز ڈیسک) ویزا سے متعلق مشکلات کا سامنا کرنے والے افراد کے لیے دبئی امیگریشن نے خصوصی سہولتیں فراہم کرنے کا اعلان کیا ہے۔
حکام کے مطابق متاثرہ سیاحوں اور ملازمت کی تلاش میں آنے والے افراد کی رہنمائی اور مدد کے لیے ایک نیا سہولت مرکز بھی قائم کر دیا گیا ہے۔میڈیا رپورٹس کے مطابق دبئی امیگریشن کے سربراہ لیفٹیننٹ جنرل محمد احمد المری نے دیگر اعلیٰ حکام کے ہمراہ پریس کانفرنس کرتے ہوئے بتایا کہ دبئی آنے والے سیاح اور روزگار کے خواہش مند افراد مملکت کے مہمان ہیں، اس لیے ان کے مسائل کا حل حکومت کی ترجیح ہے۔انہوں نے ویزا مسائل سے دوچار افراد سے اپیل کی کہ وہ بلا تاخیر دبئی امیگریشن کے الویر سینٹر سے رجوع کریں اور اپنی مشکلات سے آگاہ کریں تاکہ فوری مدد فراہم کی جا سکے۔
لیفٹیننٹ جنرل محمد احمد المری کے مطابق جن افراد کے پاس رہائش کی سہولت موجود نہیں ہوگی، انہیں عارضی قیام فراہم کیا جائے گا، جبکہ ضرورت مندوں کے لیے کھانے پینے کا بھی انتظام کیا جائے گا۔انہوں نے مزید بتایا کہ متاثرہ افراد کے لیے مفت طبی معائنہ، دانتوں کے علاج کی سہولت اور دیگر ضروری طبی خدمات بھی دستیاب ہوں گی۔ اس کے علاوہ جن افراد کو اپنے وطن واپس جانے میں مشکلات پیش آ رہی ہیں، ان کی واپسی کے انتظامات میں بھی مکمل تعاون فراہم کیا جائے گا۔
