اسلام آباد(نیوزڈیسک) نیشنل ڈیٹا بیس اینڈ رجسٹریشن اتھارٹی (نادرا) نے شناختی کارڈ پر موجودہ یا مستقل رہائشی پتا تبدیل کرانے کے خواہش مند شہریوں کے لیے نئی ہدایات جاری کر دی ہیں۔
ادارے کے مطابق درخواست گزاروں کو پتا تبدیل کرانے کے لیے مقررہ دستاویزات فراہم کرنا لازمی ہوگا۔نادرا کے اعلامیے کے مطابق اگر کوئی شہری اپنے شناختی کارڈ پر درج موجودہ (عارضی) رہائشی پتے میں تبدیلی کروانا چاہتا ہے تو اسے کرایہ نامہ، جائیداد کی رجسٹری، الاٹمنٹ لیٹر، کسی یوٹیلیٹی بل یا ایسے قریبی خون کے رشتہ دار یا شریکِ حیات کا شناختی کارڈ پیش کرنا ہوگا، جس پر مطلوبہ رہائشی پتا درج ہو۔ادارے نے یہ بھی واضح کیا ہے کہ شادی شدہ بہن کا شناختی کارڈ رہائش کے ثبوت کے طور پر قبول نہیں کیا جائے گا۔دوسری جانب مستقل رہائشی پتا تبدیل کرانے کے لیے درخواست گزار کو جائیداد کی ملکیت سے متعلق دستاویزات، یوٹیلیٹی بل یا ڈومیسائل جمع کرانا ہوگا۔
یہ دستاویزات درخواست گزار، اس کے والدین یا شریکِ حیات کے نام پر ہونا ضروری ہیں۔نادرا نے شہریوں کو بتایا ہے کہ پتا تبدیل کرانے کی درخواست قریبی نادرا رجسٹریشن سینٹر میں جمع کرائی جا سکتی ہے، جبکہ یہ سہولت آن لائن بھی دستیاب ہے۔ شہری گھر بیٹھے Pak ID موبائل ایپ کے ذریعے بھی اپنی درخواست جمع کرا سکتے ہیں۔اعلامیے میں اس بات پر زور دیا گیا ہے کہ قومی ریکارڈ کی درستگی کے لیے رہائشی معلومات کو بروقت اپ ڈیٹ کرنا ضروری ہے۔ نادرا نے شہریوں کو مشورہ دیا ہے کہ رہائش تبدیل ہونے کی صورت میں شناختی کارڈ کا ریکارڈ بھی فوری طور پر درست کروائیں تاکہ آئندہ کسی سرکاری یا قانونی معاملے میں مشکلات کا سامنا نہ کرنا پڑے۔
