اسلام آباد (نیوز ڈ یسک) حکومت کی جانب سے پیٹرولیم مصنوعات کی قیمتوں میں روزانہ کی بنیاد پر ردوبدل کے نئے نظام کے نفاذ کے بعد عوام کو مسلسل بڑھتی ہوئی قیمتوں کا سامنا کرنا پڑ رہا ہے۔

رپورٹس کے مطابق صرف گزشتہ تین روز کے دوران ہائی اسپیڈ ڈیزل کی قیمت میں فی لیٹر 20 روپے 69 پیسے کا اضافہ ریکارڈ کیا گیا، جبکہ گزشتہ چھ دنوں میں اس کی مجموعی قیمت 52 روپے 19 پیسے بڑھ چکی ہے۔اعداد و شمار کے مطابق ڈیزل کی فی لیٹر قیمت 354 روپے 35 پیسے سے بڑھ کر 375 روپے 4 پیسے تک پہنچ گئی ہے، جس سے ٹرانسپورٹ اور تجارتی شعبے پر اضافی مالی بوجھ پڑنے کا خدشہ ظاہر کیا جا رہا ہے۔دوسری جانب پیٹرول کی قیمت میں بھی مسلسل اضافہ دیکھا گیا۔ گزشتہ تین دنوں میں فی لیٹر پیٹرول 11 روپے 32 پیسے مہنگا ہوا، جبکہ اس عرصے میں صرف ایک مرتبہ 35 پیسے فی لیٹر کمی کی گئی۔نئے نرخوں کے بعد پیٹرول کی قیمت 315 روپے 80 پیسے فی لیٹر سے بڑھ کر 327 روپے 12 پیسے تک جا پہنچی ہے۔

یاد رہے کہ اس سے قبل گزشتہ ہفتے کے اختتام پر بھی حکومت نے پیٹرولیم مصنوعات کی قیمتوں میں بڑا اضافہ کیا تھا، جس کے تحت ڈیزل کی قیمت میں 31 روپے 5 پیسے اور پیٹرول کی قیمت میں 5 روپے 44 پیسے فی لیٹر اضافہ کیا گیا تھا۔