اسلام آباد (نیوز ڈیسک): پنجاب حکومت نے رہائشی سہولیات بہتر بنانے کے لیے شہریوں کو بلاسود قرض فراہم کرنے والی اسکیموں سے فائدہ اٹھانے کی ترغیب دی ہے،

جن کے ذریعے گھر کی تعمیر، مرمت، توسیع اور مضبوطی کے لیے مالی معاونت حاصل کی جا سکتی ہے۔

سرکاری اعلامیے کے مطابق “اپنی چھت، محفوظ چھت” پروگرام کے تحت گھروں کی مرمت، بحالی، مضبوطی یا توسیع کے لیے 5 لاکھ روپے تک کا بلا سود قرض فراہم کیا جا رہا ہے، جبکہ “اپنی چھت، اپنا گھر” اسکیم کے ذریعے نئے گھر کی تعمیر کے لیے 10 لاکھ روپے تک کی مالی سہولت دستیاب ہے۔

حکومت نے بتایا ہے کہ درخواست گزار آن لائن پورٹل کے ذریعے آسانی سے اپنی درخواست جمع کرا سکتے ہیں۔ اس کے علاوہ رہنمائی اور درخواست کے طریقہ کار سے متعلق معلومات کے لیے پنجاب ہاؤسنگ اینڈ ٹاؤن پلاننگ ایجنسی (PHATA)، متعلقہ ڈپٹی کمشنر اور اسسٹنٹ کمشنر کے دفاتر سے بھی رجوع کیا جا سکتا ہے۔

اعلامیے میں شہریوں پر زور دیا گیا ہے کہ وہ اس سرکاری سہولت سے استفادہ کرتے ہوئے اپنے رہائشی مکانات کی تعمیر، توسیع یا مرمت کے لیے بلاسود قرض حاصل کریں۔

مزید معلومات یا رہنمائی کے لیے حکومت نے 0800-09100 ہیلپ لائن بھی مختص کر رکھی ہے، جہاں شہری اسکیم سے متعلق تفصیلات حاصل کر سکتے ہیں۔