اسلام آباد (نیوز ڈیسک)عالمی پاسپورٹ درجہ بندی میں پاکستانی پاسپورٹ اگرچہ اب بھی نچلے درجوں میں شامل ہے،
تاہم اس کے حامل شہری دنیا کے 30 ممالک کا سفر بغیر پیشگی ویزا یا آسان ویزا سہولت کے ذریعے کر سکتے ہیں۔ ہینلے پاسپورٹ انڈیکس کی جولائی 2026 کی تازہ رپورٹ کے مطابق پاکستانی شہری مختلف ممالک میں ویزا فری، ویزا آن ارائیول یا الیکٹرانک ٹریول اتھارائزیشن (ETA) کی سہولت سے داخلے کے اہل ہیں۔ رپورٹ میں پاکستان کا پاسپورٹ عالمی فہرست میں 100ویں نمبر پر رکھا گیا ہے، جبکہ گزشتہ سال یہ 103ویں پوزیشن پر تھا۔ سال 2026 کے دوران اس کی درجہ بندی میں اتار چڑھاؤ بھی دیکھنے میں آیا۔
رپورٹ میں کہا گیا ہے کہ پاسپورٹس کی عالمی رینکنگ وقتاً فوقتاً مختلف ممالک کی ویزا پالیسیوں، دوطرفہ سفری معاہدوں اور بین الاقوامی قوانین میں تبدیلی کے باعث تبدیل ہوتی رہتی ہے۔
عالمی فہرست میں سنگاپور کا پاسپورٹ بدستور پہلے نمبر پر موجود ہے، جس کے حامل افراد 192 ممالک میں بغیر ویزا یا آسان سفری سہولت سے داخل ہو سکتے ہیں، جبکہ جاپان، جنوبی کوریا اور متحدہ عرب امارات مشترکہ طور پر دوسرے نمبر پر ہیں۔
پاکستانی پاسپورٹ رکھنے والے افراد جن ممالک کا نسبتاً آسان شرائط کے ساتھ سفر کر سکتے ہیں، ان میں مالدیپ، سری لنکا، نیپال، کینیا، سیشلز، روانڈا، بارباڈوس، ڈومینیکا، ہیٹی، وانواتو، ٹرینیڈاڈ اینڈ ٹوباگو، مائیکرونیشیا، مونٹسیرات، سینٹ ونسنٹ اینڈ گریناڈائنز، گیمبیا، برونڈی، کمبوڈیا، کیپ وردے، کومورو، جبوتی، گنی بساؤ، مڈغاسکر، نیو، پلاؤ، ساموا، سینیگال، سیرا لیون، تیمور لیستے اور تووالو شامل ہیں۔
ماہرین کے مطابق مختلف ممالک کی امیگریشن اور ویزا پالیسیوں میں تبدیلی کے باعث ان سہولتوں میں وقتاً فوقتاً ردوبدل ممکن ہے، اس لیے بیرونِ ملک سفر سے قبل متعلقہ ملک کے تازہ ترین ویزا قوانین کی تصدیق کرنا ضروری ہے۔
