اسلام آباد (نیوز ڈ یسک) ملک بھر میں مختلف کمپنیوں کے اسمارٹ فونز کی قیمتوں میں نمایاں کمی متوقع ہے،

جس کے باعث صارفین کو 10 ہزار سے 16 ہزار روپے تک کا ممکنہ ریلیف مل سکتا ہے۔فیڈرل بورڈ آف ریونیو (ایف بی آر) کی جانب سے درآمدی موبائل فونز پر عائد ریگولیٹری ڈیوٹی میں کمی کا فیصلہ سامنے آیا ہے، جس کے بعد مارکیٹ میں موبائل فونز کی قیمتیں کم ہونے کے امکانات بڑھ گئے ہیں۔ایف بی آر نے درآمد شدہ موبائل فونز پر عائد ریگولیٹری ڈیوٹی میں 20 فیصد تک کمی کی تجویز دی ہے۔ اس اقدام کے نتیجے میں مختلف برانڈز کے مہنگے اور درمیانے درجے کے اسمارٹ فونز کی قیمتوں میں خاطر خواہ کمی آ سکتی ہے۔

ماہرین کے مطابق ڈیوٹی میں کمی کا براہِ راست فائدہ صارفین کو پہنچے گا اور کئی موبائل فون ماڈلز کی قیمتیں 16 ہزار روپے تک کم ہو سکتی ہیں۔ اس فیصلے کو موبائل صارفین کے لیے ایک مثبت پیش رفت قرار دیا جا رہا ہے، جس سے مارکیٹ میں خریداری کے رجحان میں بھی اضافہ متوقع ہے۔