اسلام آباد (نیوز ڈیسک) متحدہ عرب امارات نے اپنی پہلی مسافر ریل سروس کا باقاعدہ آغاز کر دیا ہے،

جس کے ذریعے ملک کی مختلف ریاستوں کو جدید ریلوے نیٹ ورک کے ذریعے آپس میں منسلک کیا جا رہا ہے۔رپورٹس کے مطابق ابوظہبی کے ولی عہد شیخ خالد بن محمد بن زاید النہیان نے محمد بن زاید سٹی میں قائم نئے مسافر ریلوے اسٹیشن کا افتتاح کیا۔ اس منصوبے کو امارات میں ٹرانسپورٹ کے شعبے میں ایک اہم سنگِ میل قرار دیا جا رہا ہے۔حکام کا کہنا ہے کہ ابوظہبی اور فجیرہ کے درمیان مسافر ٹرین سروس 30 جون سے عوام کے لیے دستیاب ہوگی۔

اس روٹ پر سفر کا دورانیہ تقریباً ایک گھنٹہ 45 منٹ ہوگا، جبکہ عام کلاس کا کرایہ 55 درہم سے شروع ہوگا۔ اسی طرح پریمیئم کلاس کے مسافروں کے لیے ٹکٹ کی قیمت 120 درہم مقرر کی گئی ہے۔اماراتی حکام کے مطابق یہ جدید ریلوے منصوبہ ملک میں سفر، تجارت، سیاحت اور معاشی سرگرمیوں کے فروغ میں اہم کردار ادا کرے گا اور مختلف شہروں کے درمیان رابطوں کو مزید مضبوط بنائے گا۔منصوبے کے اگلے مرحلے میں 30 ستمبر 2026 کو دبئی اور شارجہ کے علاقے الذید میں نئے ریلوے اسٹیشنز کا افتتاح کیا جائے گا۔اس کے علاوہ ابوظہبی کے مغربی علاقے الظفرہ میں دسمبر 2026 کے دوران ریل سروس شروع کرنے کا منصوبہ ہے، جبکہ شارجہ کا مرکزی ریلوے اسٹیشن مارچ 2027 میں قومی ریلوے نیٹ ورک کا حصہ بن جائے گا۔