اسلام آباد (نیوز ڈیسک) حکومتِ سندھ نے سرکاری ملازمین اور پنشنرز کے لیے تنخواہوں اور پنشن کی ادائیگی کا نیا نظام متعارف کرا دیا ہے،
جس کے تحت اب ملازمین کو ہر ماہ کی پہلی تاریخ کا انتظار نہیں کرنا پڑے گا۔ میڈیا رپورٹس کے مطابق سندھ حکومت نے صوبے کے سرکاری ملازمین اور ریٹائرڈ افراد کو سہولت فراہم کرنے کے لیے ادائیگیوں کا نیا شیڈول جاری کر دیا ہے۔ اس اقدام کا مقصد ملازمین کو بروقت مالی وسائل فراہم کرنا اور ان کے مالی معاملات کو آسان بنانا ہے۔
اکاؤنٹنٹ جنرل سندھ کی جانب سے جاری نوٹیفکیشن کے مطابق اب سرکاری ملازمین کی ماہانہ تنخواہیں ہر ماہ کی 25 تاریخ کو ادا کی جائیں گی، جبکہ پنشنرز کو ان کی پنشن 26 تاریخ کو جاری کر دی جائے گی۔
اسی طرح اضافی اور ضمنی ادائیگیوں کا عمل ہر ماہ کی 29 تاریخ تک مکمل کیا جائے گا۔ جنرل پروویڈنٹ فنڈ اور دیگر واجبات کی ادائیگیوں کے لیے بھی نیا طریقہ کار وضع کیا گیا ہے، جس کے تحت یہ ادائیگیاں ہر ماہ 6 سے 16 تاریخ کے درمیان اور 20 تاریخ کو پراسیس کی جائیں گی۔
اکاؤنٹنٹ جنرل سندھ نے تمام سرکاری اداروں اور متعلقہ محکموں کو ہدایت کی ہے کہ تنخواہوں اور دیگر ادائیگیوں سے متعلق پے رول کی دستاویزات مقررہ وقت کے اندر جمع کرائی جائیں تاکہ فنڈز کی منتقلی میں کسی قسم کی تاخیر نہ ہو۔
حکومت کے اس فیصلے سے سرکاری ملازمین کو نئے مہینے کے آغاز سے پہلے ہی اپنی تنخواہیں مل جائیں گی، جس سے موجودہ مہنگائی کے دور میں انہیں مالی سہولت اور بہتر منصوبہ بندی کا موقع حاصل ہوگا۔
