اسلام آباد (نیوز ڈیسک)عالمی مارکیٹ میں خام تیل اور پیٹرولیم مصنوعات کی قیمتیں گزشتہ تین ماہ کی کم ترین سطح تک گر گئی ہیں،

جس کے اثرات پاکستان میں بھی متوقع ہیں اور عوام کو ایندھن کی قیمتوں میں ریلیف ملنے کا امکان ظاہر کیا جا رہا ہے۔مارکیٹ ذرائع کے مطابق آئندہ قیمتوں کے تعین میں پیٹرول کی فی لیٹر قیمت تقریباً 22 روپے کم کرنے کی تجویز زیر غور ہے، جبکہ ہائی اسپیڈ ڈیزل کے نرخوں میں 42 روپے فی لیٹر تک کمی کی سفارش کی گئی ہے۔انڈسٹری ذرائع کا کہنا ہے کہ پیٹرول کی ایکس ریفائنری قیمت میں 18 روپے 18 پیسے فی لیٹر کمی ریکارڈ کی گئی ہے، جس کے بعد اس کی قیمت 245 روپے 16 پیسے سے کم ہو کر 226 روپے 98 پیسے فی لیٹر رہ گئی ہے۔اسی طرح ہائی اسپیڈ ڈیزل کی ایکس ریفائنری قیمت میں 36 روپے 16 پیسے کی کمی دیکھی گئی، جس کے بعد اس کی نئی قیمت تقریباً 268 روپے فی لیٹر تک پہنچ گئی ہے۔

تاہم پیٹرولیم مصنوعات کی نئی قیمتوں کا حتمی اعلان وفاقی حکومت کی منظوری کے بعد ہی کیا جائے گا۔ ذرائع کے مطابق حکومت لیوی کے نظام میں ردوبدل پر بھی غور کر رہی ہے۔اطلاعات ہیں کہ ڈیزل پر عائد لیوی میں 27 روپے فی لیٹر تک اضافہ کیا جا سکتا ہے، جبکہ پیٹرول پر موجود اضافی لیوی کو تقریباً 26 روپے کم کرنے کی تجویز زیر غور ہے۔ ماہرین کے مطابق ڈیزل پر لیوی بڑھنے کی صورت میں پیٹرول کی قیمت میں متوقع کمی کا مکمل فائدہ صارفین تک منتقل نہیں ہو سکے گا اور عوام کو نسبتاً کم ریلیف ملے گا۔