لاہور( این این آئی)پنجاب اسمبلی کی پبلک اکائونٹس کمیٹی ون نے صوبہ بھر میں ناجائز اور غیر قانونی ہائوسنگ سوسائٹیوں کی مکمل تفصیلات طلب کر تے ہوئے استفسار کیا ہے کہ بہاولپور میں 22 ہزار ایکڑ اراضی کو برائون لینڈ ڈیکلیئر کئے بغیر کیسے سوسائٹی بن گئی ۔

پی اے سی ون کا اجلاس چیئرمین کمیٹی افتخار حسین چھچھر کی صدارت میں ہوا۔ اجلاس میںمالی سال 2022-23 کے محکمہ ایس اینڈ جی اے ڈی کے آڈٹ پیراز زیر بحث آئے ۔ چیئرمین افتخا ر حسین چھچھر نے سارے پنجاب میں ناجائز اور غیرقانونی ہائوسنگ سوسائٹیوں کی تفصیل پیش کرنے کی ہدایت کرتے ہوئے کہا کہ حکومت کے احکامات کے بعد قابضین کے خلاف کیا کاروائی ہوئی بتایا جائے، کمیٹی کو جواب دیا جائے کے اطلاع ہونے کے باوجود متعلقہ کمشنر اور ڈپٹی کمشنر کمیٹی میں کیوں پیش نہیں ہوئے۔ کمیٹی نے ہدایت کی کہ تمام متعلقہ افسران پرسوں پیش ہو کر جواب دیں کے وہ اجلاس میں کیوں شریک نہیں ہوئے۔

چیئرمین نے کہا کہ پرسوں تک اجلاس ملتوی کر رہے ہیں ۔ رپورٹ پیش کی جائے22 ہزار ایکڑ پر برائون لینڈ ڈیکلیئر کئے بغیر کیسے سوسائٹی بنی، اس پیرا کے علاوہ بھی تمام پنجاب میں موجود غیر قانونی سوسائٹیوں کی تفصیل دی جائے۔