اسلام آباد (نیوز ڈیسک)وفاقی حکومت نے آئندہ مالی سال کے بجٹ میں ایوانِ صدر اور وزیرِاعظم ہاؤس کے باغات، لانز اور سبزہ زاروں کی نگہداشت کے لیے
مجموعی طور پر 15 کروڑ روپے مختص کرنے کی تجویز پیش کی ہے۔بجٹ دستاویزات کے مطابق صدرِ مملکت کی سرکاری رہائش گاہ کے باغات کی تزئین و آرائش، نئے پودوں کی خریداری، گھاس کی دیکھ بھال اور مالیوں سمیت دیگر اخراجات کے لیے 10 کروڑ 50 لاکھ روپے رکھنے کی سفارش کی گئی ہے۔اسی طرح وزیرِاعظم ہاؤس کے سبزہ زاروں اور باغات کی مرمت، نگہداشت اور خوبصورتی برقرار رکھنے کے لیے 4 کروڑ 50 لاکھ روپے مختص کرنے کی تجویز بھی بجٹ کا حصہ ہے۔دستاویزات سے ظاہر ہوتا ہے کہ یہ فنڈز سرکاری رہائش گاہوں کے باغبانی سے متعلق مختلف انتظامی اور دیکھ بھال کے امور پر خرچ کیے جائیں گے تاکہ ان مقامات کی گرینری اور ماحول کو برقرار رکھا جا سکے۔
دوسری جانب بعض ناقدین نے اس مجوزہ اخراجات پر سوالات اٹھاتے ہوئے مؤقف اختیار کیا ہے کہ موجودہ معاشی حالات میں، جب عوام مہنگائی اور دیگر مالی مشکلات کا سامنا کر رہے ہیں، ایسے اخراجات پر بحث ہونا فطری امر ہے۔ ان کے مطابق قومی وسائل کے استعمال میں ترجیحات کا تعین عوامی ضروریات کو مدنظر رکھتے ہوئے کیا جانا چاہیے۔تاہم حکومت کی جانب سے اس رقم کو سرکاری عمارتوں کی معمول کی دیکھ بھال اور انتظامی ضروریات کا حصہ قرار دیا جا رہا ہے۔
ایوان صدر میں صدر زرداری بیٹھتے ہیں! صدر کے باغ کیلیے ساڑھے دس کروڑ اور وزیر اعظم کے باغ کیلیے ساڑھے چار کروڑ رکھے گئے https://t.co/uUdS6Qxfyx
— Zahid Gishkori (@ZahidGishkori) June 13, 2026
