اسلام آباد (نیوز ڈیسک)بین الاقوامی تیل مارکیٹ میں خام تیل کی قیمتوں میں نمایاں کمی ریکارڈ کی گئی ہے،

جہاں برینٹ اور امریکی خام تیل دونوں کی قیمتیں تین فیصد سے زیادہ نیچے آ گئی ہیں۔تازہ اعداد و شمار کے مطابق برطانوی برینٹ خام تیل کی قیمت میں 3.37 فیصد کمی ہوئی، جس کے بعد یہ 87.33 ڈالر فی بیرل پر آ گئی۔ ماہرین کے مطابق یہ سطح رواں سال مارچ کے آغاز کے بعد سب سے کم تصور کی جا رہی ہے۔اسی طرح امریکی خام تیل ویسٹ ٹیکساس انٹرمیڈیٹ (WTI) کی قیمت بھی 3.23 فیصد گر گئی، جس کے بعد اس کا نرخ 84.88 ڈالر فی بیرل پر بند ہوا۔ یہ اپریل کے بعد امریکی خام تیل کی کم ترین قیمت قرار دی جا رہی ہے۔تجزیہ کاروں کا کہنا ہے کہ تیل کی قیمتوں میں حالیہ گراوٹ کی ایک بڑی وجہ امریکا اور ایران کے درمیان ممکنہ پیش رفت اور معاہدے سے متعلق اطلاعات ہیں،

جنہوں نے عالمی مارکیٹ میں سپلائی بڑھنے کی توقعات کو تقویت دی ہے۔دوسری جانب پاکستان میں بھی حالیہ دنوں میں پیٹرولیم مصنوعات کی قیمتوں میں کمی کی جا چکی ہے۔ ماہرین کا خیال ہے کہ اگر عالمی منڈی میں خام تیل کی قیمتیں مزید نیچے آتی رہیں تو آئندہ دنوں میں ملک میں پیٹرول اور ڈیزل کی قیمتوں میں مزید کمی کا امکان پیدا ہو سکتا ہے۔