لاہور( این این آئی)ٹریفک پولیس نے ای چالان کی مد میں 20لاکھ روپے سے زائد واجبات رکھنے والے ریکارڈ ڈیفالٹر موٹر سائیکل سوار کو پکڑ لیا۔
سی ٹی او لاہور عبدالرحیم شیرازی کے مطابق ٹریفک قوانین کی خلاف ورزیوں کا بڑا ریکارڈ رکھنے والے شہری باز محمد کو چیکنگ کے دوران روکا گیا۔ نجی ٹی وی کے مطابق ملکیت کی جانچ پڑتال کے دوران انکشاف ہوا کہ اس کے نام پر 421گاڑیاں، رکشے اور موٹر سائیکلیں رجسٹرڈ ہیں۔سی ٹی او کے مطابق باز محمد پر 20لاکھ 88ہزار 800روپے سے زائد کے ای چالان واجب الادا ہیں جس کی بنیاد پر شہری کی موٹر سائیکل کو قبضے میں لے کر تھانہ مسلم ٹائون میں بند کر دیا گیا ۔
عبدالرحیم شیرازی کے مطابق باز محمد کے نام پر رجسٹرڈ تمام گاڑیوں اور موٹر سائیکلوں کو بلیک لسٹ کر دیا گیا ہے۔انہوں نے مزید بتایا کہ لاہور میں ایک لاکھ سے زائد ای چالان ڈیفالٹر گاڑیوں اور موٹر سائیکلوں کو بھی بلیک لسٹ کیا جا چکا ہے۔
