وان، ترکیہ (نیوز ڈیسک)ترکیہ میں ایک حیران کن واقعہ اس وقت سامنے آیا جب ایک نوجوان کے بینک اکاؤنٹ میں اچانک اربوں ڈالر کی خطیر رقم ظاہر ہونے لگی،
جس کے بعد بینک اور متعلقہ حکام نے فوری تحقیقات کا آغاز کر دیا۔
میڈیا رپورٹس کے مطابق مشرقی ترکیہ کے صوبے وان میں مقیم 32 سالہ آذربائیجانی شہری احمد جہانگیر دتاکالو اس غیر معمولی صورتحال سے اس وقت آگاہ ہوا جب خریداری کے دوران اس کا بینک کارڈ اچانک کام کرنا بند کر گیا۔
مسئلے کی وجہ جاننے کے لیے جب وہ بینک برانچ پہنچا تو معلوم ہوا کہ اس کے اکاؤنٹ میں تقریباً 21 ارب امریکی ڈالر کے مساوی رقم موجود ہے، جسے دیکھ کر وہ خود بھی حیرت زدہ رہ گیا۔
بینک ریکارڈ کے مطابق اکاؤنٹ میں 999 ارب 999 ملین 999 ہزار 999 ترک لیرے اور 99 قروش کی رقم درج تھی، جو مالیت کے اعتبار سے ایک غیر معمولی اور ناقابلِ یقین رقم بنتی ہے۔
احمد جہانگیر کا کہنا ہے کہ اسے اس بات کا کوئی علم نہیں کہ اس کے اکاؤنٹ میں اتنی بڑی رقم کیسے منتقل ہوئی، اور نہ ہی اس کا اس لین دین سے کوئی تعلق ہے۔
واقعے کے بعد بینک انتظامیہ نے احتیاطی اقدام کے طور پر متعلقہ اکاؤنٹس کو فوری طور پر منجمد کر دیا ہے، جبکہ ماہرین اور ریگولیٹری ادارے اس معاملے کی مختلف پہلوؤں سے جانچ کر رہے ہیں۔
ابتدائی طور پر یہ معلوم کرنے کی کوشش کی جا رہی ہے کہ آیا یہ معاملہ کسی تکنیکی خرابی، ڈیٹا انٹری کی غلطی یا بینکنگ سسٹم کے کسی اور مسئلے کا نتیجہ ہے۔
تحقیقات مکمل ہونے تک اکاؤنٹ ہولڈر کو اپنے بینک اکاؤنٹس استعمال کرنے یا کسی قسم کا مالی لین دین کرنے کی اجازت نہیں دی گئی، جبکہ حکام ریکارڈ اور سسٹمز کا تفصیلی جائزہ لے رہے ہیں تاکہ اصل حقیقت سامنے لائی جا سکے۔
استيقظ شاب مقيم في ولاية وان شرقي #تركيا على مفاجأة غير متوقعة بعدما ظهر في حسابه المصرفي رصيد ضخم يقترب من تريليون ليرة تركية، في واقعة أثارت اهتمام الرأي العام ودفعت الجهات المختصة إلى فتح تحقيق لكشف ملابساتها. pic.twitter.com/2sBvzmC1Y7
— تركيا بالعربي (@arab_turkey_com) June 3, 2026
