اسلام آباد (نیوز ڈیسک) آئندہ مالی سال کے بجٹ کے اعلان سے قبل ہی ملک میں سولر پینلز کی قیمتوں میں نمایاں اضافہ دیکھنے میں آیا ہے،

جس سے صارفین اور سرمایہ کاروں میں تشویش پائی جا رہی ہے۔مارکیٹ ذرائع کے مطابق مختلف صلاحیت کے سولر پینلز کی قیمتوں میں 7 ہزار سے 9 ہزار روپے تک اضافہ ریکارڈ کیا گیا ہے۔ قیمتوں میں اضافے کے بعد 585 واٹ کا سولر پینل، جو پہلے تقریباً 18 ہزار روپے میں دستیاب تھا، اب 27 ہزار روپے تک فروخت ہو رہا ہے۔اسی طرح 645 واٹ کے پینل کی قیمت 22 ہزار روپے سے بڑھ کر 31 ہزار 200 روپے تک جا پہنچی ہے، جبکہ 720 واٹ کا سولر پینل 25 ہزار روپے کے بجائے 33 ہزار 500 روپے میں فروخت کیا جا رہا ہے۔مارکیٹ ماہرین کا کہنا ہے کہ سولر پینلز کے ساتھ ساتھ انورٹرز کی قیمتوں میں بھی جلد اضافے کا امکان موجود ہے،

جس سے مکمل سولر سسٹم کی لاگت مزید بڑھ سکتی ہے۔یاد رہے کہ آئندہ بجٹ کے حوالے سے یہ تجویز زیر غور رہی ہے کہ سولر پینلز پر جنرل سیلز ٹیکس (جی ایس ٹی) کی شرح 10 فیصد سے بڑھا کر 18 فیصد کر دی جائے۔ اگرچہ اس حوالے سے ابھی کوئی حتمی اعلان نہیں ہوا، تاہم کراچی سمیت مختلف مارکیٹوں میں قیمتوں میں پیشگی اضافہ دیکھنے میں آ رہا ہے۔