اسلام آباد (نیوز ڈیسک) پاکستان ٹیلی کمیونیکیشن اتھارٹی (پی ٹی اے) نے عوام کو خبردار کیا ہے کہ اپنے نام پر رجسٹرڈ موبائل سم کسی اور فرد کے استعمال کے لیے دینا قانونی مسائل کا سبب بن سکتا ہے۔
پی ٹی اے کے ترجمان کی جانب سے جاری بیان میں کہا گیا ہے کہ اگر کسی شہری کے نام پر رجسٹرڈ سم غیر قانونی سرگرمیوں میں استعمال ہوتی ہے تو اس کے نتائج متعلقہ رجسٹرڈ صارف کو بھگتنا پڑ سکتے ہیں۔ اسی لیے شہری اپنی سموں کے استعمال کے حوالے سے مکمل احتیاط برتیں۔
اتھارٹی نے عوام کو مشورہ دیا ہے کہ وہ وقتاً فوقتاً چیک کریں کہ ان کے شناختی کارڈ پر کتنی موبائل سمیں رجسٹرڈ ہیں۔ اس مقصد کے لیے شہری **cnic.sims.pk** پر جا کر معلومات حاصل کر سکتے ہیں یا اپنا قومی شناختی کارڈ نمبر (بغیر ڈیش) **668** پر ایس ایم ایس کر کے تفصیلات معلوم کر سکتے ہیں۔
پی ٹی اے نے مزید ہدایت کی ہے کہ اگر کسی شخص کے نام پر کوئی غیر متعلقہ یا نامعلوم سم رجسٹرڈ ہو تو اسے فوری طور پر بند کروایا جائے۔ اسی طرح نئی سم حاصل کرتے وقت صرف مجاز فرنچائز یا کسٹمر سروس سینٹر سے رجوع کیا جائے۔
مزید رہنمائی اور معلومات کے لیے شہری پی ٹی اے کی سرکاری ویب سائٹ سے بھی استفادہ کر سکتے ہیں۔
