اسلام آباد (نیوز ڈیسک) مشرق وسطیٰ میں جاری جغرافیائی کشیدگی کے اثرات توانائی کی عالمی منڈیوں پر بدستور نمایاں ہیں،

جس کے باعث پاکستان میں مائع پیٹرولیم گیس (ایل پی جی) کی قیمت میں بھی اضافہ کر دیا گیا ہے۔آئل اینڈ گیس ریگولیٹری اتھارٹی (اوگرا) کی جانب سے جاری کردہ نئے نرخوں کے مطابق ایل پی جی کی فی کلو قیمت میں 4 روپے 95 پیسے کا اضافہ کیا گیا ہے۔ اس اضافے کے بعد گھریلو استعمال کے 11.8 کلوگرام والے سلنڈر کی قیمت میں 58 روپے 51 پیسے کا اضافہ ریکارڈ کیا گیا ہے۔جون 2026 کے لیے گھریلو ایل پی جی سلنڈر کی نئی قیمت 3 ہزار 643 روپے 41 پیسے مقرر کی گئی ہے، جبکہ فی کلو گیس کی قیمت 308 روپے 76 پیسے تک پہنچ گئی ہے۔اوگرا کے مطابق نئی قیمتوں کا اطلاق فوری طور پر کر دیا گیا ہے،

جس کے بعد صارفین کو ایل پی جی کی خریداری کے لیے پہلے کے مقابلے میں زیادہ رقم ادا کرنا ہوگی۔ماہرین کا کہنا ہے کہ عالمی توانائی مارکیٹ میں غیر یقینی صورتحال اور خام ایندھن کی قیمتوں میں اتار چڑھاؤ مقامی مارکیٹ پر بھی اثر انداز ہو رہا ہے، جس کے نتیجے میں ایل پی جی سمیت مختلف توانائی ذرائع کی قیمتوں میں اضافہ دیکھنے میں آ رہا ہے۔