لاہور( این این آئی)پنجاب حکومت کی آئندہ مالی سال 2026-27 کے بجٹ کی تیاری حتمی مراحل میں داخل ہو گئی ہے ،

آئندہ صوبائی بجٹ میں کوئی نیا ٹیکس عائد نہ کرنے کی تجویز زیر غور ہے۔وزارتِ خزانہ کے ذرائع کے مطابق اگرچہ نئے ٹیکسز لگانے کی تجویز نہیں تاہم ٹیکس نیٹ کو وسیع کرنے اور بعض خدمات پر ٹیکس کی شرح میں رد و بدل کیا جا سکتا ہے تاکہ آمدنی میں بہتری لائی جا سکے۔بجٹ میں حکومت کی ترجیحات واضح کر دی گئی ہیں جن میں تعلیم، صحت، سڑکوں کی تعمیر، صفائی ستھرائی، زراعت، امن و امان اور عوام کو سستی خوراک کی فراہمی شامل ہیں۔حکومتی ذرائع کے مطابق آئندہ مالی سال کیلئے پنجاب بجٹ کا مجموعی حجم تقریباً 6 ہزار ارب روپے رہنے کا امکان ہے جبکہ ترقیاتی منصوبوں کیلئے 1500 ارب روپے مختص کرنے کی تجویز دی گئی ہے۔ذرائع نے یہ بھی بتایا ہے کہ سرکاری ملازمین کی تنخواہوں اور پنشن میں وفاقی حکومت کے برابر اضافہ کرنے کی تجویز بھی بجٹ کا حصہ ہو گی۔