اسلام آباد (این این آئی)آئی ایم ایف نے پاکستان سے سیلز ٹیکس میں ہر قسم کی چھوٹ ختم کرنے کا مطالبہ کردیا۔

ذرائع کے مطابق آئی ایم ایف اور ایف بی آر کے درمیان آئندہ مالی سال کے بجٹ سے متعلق مذاکرات آخری مرحلے میں داخل ہو گئے ہیں۔ذرائع کے مطابق آئی ایم ایف مشن نے پاکستان سے سیلز ٹیکس میں ہر قسم کی چھوٹ اور استثنیٰ ختم کرنے کا مطالبہ کیا ہے۔ آئی ایم ایف کی جانب سے آئندہ مالی سال کیلئے 15ہزار 264ارب روپے کے ٹیکس ہدف پر اصرار کیا جا رہا ہے جبکہ ایف بی آر اس ہدف میں کمی کیلئے کوششیں کر رہا ہے۔ ذرائع کے مطابق آئی ایم ایف نے انفورسمنٹ اقدامات کے ذریعے 778 ارب روپے اضافی وصولی کا مطالبہ بھی کیا ہے، آئندہ بجٹ میں 430 ارب روپے کے نئے ٹیکس اقدامات زیر غور ہیں۔

علاوہ ازیں ایف بی آر اور آئی ایم ایف کے درمیان ٹیکس ہدف کو جی ڈی پی کے 11.2 فیصد کے برابر رکھنے پر اتفاق ہو گیا ہے۔آئی ایم ایف نے سیلز ٹیکس کی موجودہ 22.8فیصد شرح کم کر کے 18فیصد کرنے کی تجویز بھی دی ہے، تاہم اس کیساتھ تمام استثنیٰ ختم کرنے کا مطالبہ برقرار رکھا گیا ہے۔