اسلام آباد (نیوز ڈیسک) ایک سے زیادہ سنگل فیز میٹر استعمال کرکے بجلی کے بلوں میں سبسڈی حاصل کرنے والے صارفین کے خلاف کارروائی کا فیصلہ کر لیا گیا ہے۔
بجلی تقسیم کار کمپنیوں نے ایسے صارفین کا مکمل ڈیٹا جمع کرنے کا عمل شروع کر دیا ہے۔رپورٹس کے مطابق پروٹیکٹڈ کیٹیگری میں رعایتی نرخوں سے فائدہ اٹھانے کے لیے اضافی میٹرز لگانے والوں کو اب نان پروٹیکٹڈ ٹیرف کے تحت بل جاری کیے جائیں گے۔ حکام کا کہنا ہے کہ اس تبدیلی کے بعد صارفین کے ماہانہ بلوں میں تقریباً 8 سے 10 ہزار روپے تک اضافہ ہو سکتا ہے۔
لیسکو سمیت مختلف ڈسکوز نے بجلی کے بلوں پر دی جانے والی سبسڈی کی تفصیلات نمایاں کرنا شروع کر دی ہیں۔ اس مقصد کے لیے بلوں پر خصوصی کیو آر کوڈ بھی شامل کیا جا رہا ہے تاکہ اضافی میٹرز رکھنے والے صارفین کا ریکارڈ مرتب کیا جا سکے۔
حکام کے مطابق نئے نظام کے تحت صرف حقیقی اور مستحق صارفین کو ہی پروٹیکٹڈ کیٹیگری کی رعایت فراہم کی جائے گی۔ بجلی کمپنیوں کا کہنا ہے کہ جو صارفین کیو آر کوڈ کے ذریعے مطلوبہ معلومات فراہم نہیں کریں گے، ان کی سبسڈی ختم کر دی جائے گی۔
