اسلام آباد (نیوز ڈ یسک)اسلام آباد میں آن لائن سرمایہ کاری کے نام پر بڑے مالیاتی اسکینڈل کا انکشاف سامنے آیا ہے،

جہاں مبینہ طور پر موبائل ایپس کے ذریعے شہریوں سے کروڑوں روپے وصول کیے گئے۔میڈیا رپورٹس کے مطابق این سی سی آئی اے نے 270 متاثرین سے 13 کروڑ 40 لاکھ روپے سے زائد رقم بٹورنے کے الزام میں مقدمہ درج کر کے تحقیقات شروع کر دی ہیں۔حکام کے مطابق کیس ایک مقامی شہری مراد خان کی درخواست پر درج کیا گیا، جس میں غیر ملکی باشندوں سمیت متعدد افراد کو نامزد کیا گیا ہے۔ ملزمان کے خلاف پیکا ایکٹ اور دھوکہ دہی سے متعلق مختلف دفعات کے تحت کارروائی کی جا رہی ہے۔

تحقیقات کے مطابق ملزمان شہریوں کو آن لائن سرمایہ کاری پر بھاری منافع کا لالچ دیتے تھے اور مختلف موبائل ایپس کے ذریعے رقم وصول کرتے رہے۔ ابتدائی شواہد کے مطابق متعدد افراد اس فراڈ کا شکار ہوئے ہیں جبکہ حکام مزید متاثرین اور نیٹ ورک کے دیگر کرداروں کی تفصیلات جمع کر رہے ہیں۔