کراچی(این این آئی)پاکستان کی اوپن مارکیٹ میں ایرانی ریال کی قیمت میں غیر معمولی تیزی ریکارڈ کی گئی ہے۔

کرنسی ڈیلرز کے مطابق اوپن مارکیٹ میں ایرانی ریال کا ایک کروڑ کا بنڈل آٹھ ہزار سے دس ہزار روپے تک پہنچ گیا ہے۔اوپن مارکیٹ میں ایرانی ریال کی قیمتوں میں غیر معمولی تیزی کا تسلسل برقرار ہے، انٹرنیشنل مارکیٹ میں ایرانی ریال کی قدر انتہائی کم ہونے کے باوجود پاکستان میں ایرانی ریال کی اپنی اصل قیمت سے تین سے چار گنا زائد پریمیئم پر فروخت جاری ہے۔بین الاقوامی ریٹ کے مطابق ایک کروڑ ایرانی ریال پاکستانی روپوں میں صرف 2125 روپے میں مل رہا ہے، پاکستان میں قیمت میں تیزی کی وجہ یہ ہے کہ مقامی سرمایہ کار امید ظاہر کر رہے ہیں کہ امریکا ایران معاہدے کے بعد ریال کی قدر میں اضافہ ہو گا۔

معاشی ماہرین نے شہریوں کو خبردار کرتے ہوئے کہا ہے کہ ایرانی ریال کی قیمتوں میں تیزی مقامی طلب اور قیاس آرائیوں پر مبنی ہے، عالمی سطح پر کرنسی میں اتار چڑھا کی وجہ سے سرمایہ کاروں کو نقصان بھی اٹھانا پڑ سکتا ہے۔