اسلام آباد (نیوز ڈیسک) آل پاکستان صرافہ جیمز اینڈ جیولرز ایسوسی ایشن کے مطابق ملک بھر میں سونے اور چاندی کی قیمتوں میں نمایاں اضافہ دیکھنے میں آیا ہے،

جبکہ عالمی مارکیٹ میں بھی قیمتی دھاتوں کے نرخ اوپر چلے گئے ہیں۔ایسوسی ایشن کی جانب سے جاری اعداد و شمار کے مطابق 24 قیراط فی تولہ سونے کی قیمت میں 4 ہزار 100 روپے کا اضافہ ریکارڈ کیا گیا، جس کے بعد نئی قیمت 4 لاکھ 92 ہزار 462 روپے تک پہنچ گئی ہے۔اسی طرح 10 گرام سونے کی قیمت بھی 3 ہزار 515 روپے اضافے کے بعد 4 لاکھ 22 ہزار 206 روپے ہو گئی ہے۔

چاندی کی قیمتوں میں بھی نمایاں اضافہ ہوا ہے۔ 24 قیراط فی تولہ چاندی 395 روپے مہنگی ہونے کے بعد 8 ہزار 908 روپے کی سطح پر پہنچ گئی۔عالمی مارکیٹ کی بات کی جائے تو فی اونس سونے کی قیمت میں 41 ڈالر اضافہ ریکارڈ کیا گیا، جس کے بعد عالمی سطح پر سونا 4701 ڈالر فی اونس تک جا پہنچا ہے۔