اسلام آباد (این این آئی)ایک ہفتے کے دوران مہنگائی کی شرح میں 0.79فیصد اضافہ ہوا جبکہ سالانہ بنیادوں پر مجموعی شرح 15.16 فیصد تک پہنچ گئی ہے۔

ادارہ شماریات کی جانب سے جاری رپورٹ کے مطابق حالیہ ہفتے کے دوران 22اشیائے ضروریہ کی قیمتوں میں اضافہ جبکہ 14اشیا کی قیمتوں میں کمی ریکارڈ کی گئی۔ادارہ شماریات کے مطابق چکن کی قیمت میں 12.82فیصد اضافہ ہوا، جبکہ ڈیزل 5.10فیصد مہنگا ہوا۔ اسی طرح آٹا 3.42فیصد اور پٹرول 1.66فیصد مہنگا ریکارڈ کیا گیا۔تازہ دودھ کی قیمت میں 1.33فیصد جبکہ بیف 0.65فیصد مہنگا ہوا، مٹن 0.50فیصد اور آلو 0.48 فیصد اضافے کے ساتھ فروخت ہوئے، دوسری جانب ٹماٹر کی قیمت میں 7.08فیصد کمی ہوئی جبکہ لہسن 1.19فیصد سستا ہوا۔ادارہ شماریات کے مطابق انڈے 1.22فیصد، ایل پی جی 1.08فیصد اور پیاز 0.38فیصد سستے ہوئے، دال چنا، دال مسور اور گڑ کی قیمتوں میں بھی معمولی کمی ریکارڈ کی گئی، جبکہ 15اشیا کی قیمتوں میں کوئی ردوبدل نہیں ہوا۔