اسلام آباد (نیوزڈیسک) پاکستان میں آئی فون استعمال کرنے والوں کے لیے ایک اہم خبر سامنے آئی ہے،

جہاں ایپل نے ملک میں 5G سہولت کے اجرا سے متعلق فی الحال معذرت کر لی ہے۔ رپورٹس کے مطابق آئی فون صارفین اب 2027 سے پہلے 5G سروس استعمال نہیں کر سکیں گے۔ذرائع کے مطابق وزارتِ آئی ٹی اور ٹیلی کام کو ایپل کی جانب سے آگاہ کیا گیا ہے کہ کمپنی پاکستانی مارکیٹ کا دوبارہ جائزہ 2027 میں لے گی، جس کے بعد ہی آئی فون ڈیوائسز پر 5G سپورٹ فعال کرنے کے بارے میں فیصلہ کیا جائے گا۔ماہرین کے مطابق پاکستان میں درآمدی موبائل فونز، خاص طور پر آئی فونز پر عائد بھاری ٹیکسز کی وجہ سے ایپل کی مارکیٹ محدود ہو چکی ہے، جس کے باعث کمپنی نے اپنی جدید سروسز متعارف کرانے میں تاخیر کی ہے۔دوسری جانب سام سنگ سمیت بعض دیگر برانڈز کے اسمارٹ فونز پر 5G ٹیکنالوجی پہلے ہی فعال ہے اور صارفین اس سہولت سے فائدہ اٹھا رہے ہیں۔

یاد رہے کہ حکومتِ پاکستان نے مارچ میں تقریباً 507 ملین ڈالر مالیت کے 5G اسپیکٹرم کی نیلامی مکمل کی تھی، جس کے تحت 480 میگا ہرٹز اسپیکٹرم فروخت کیا گیا تاکہ ملک میں تیز رفتار انٹرنیٹ سروسز کو فروغ دیا جا سکے۔ٹیلی کام حکام کا کہنا ہے کہ موبائل کمپنیوں نے 5G نیٹ ورک کے لیے ضروری آلات کی خریداری شروع کر دی ہے جبکہ چند شہروں کے مخصوص علاقوں میں آزمائشی سروس بھی جاری ہے، تاہم آئی فون صارفین کو اس جدید نیٹ ورک کے استعمال کے لیے مزید انتظار کرنا ہوگا۔