کراچی(این این آئی) صوبائی وزیر ایکسائز، ٹیکسیشن و نارکوٹکس کنٹرول سندھ مکیش کمار چائولہ کی ہدایت پر محکمہ ایکسائز سندھ نے گاڑی مالکان کے لیے اہم سہولت کا اعلان کردیا۔

محکمہ ایکسائز، ٹیکسیشن و نارکوٹکس کنٹرول سندھ کی جانب سے جاری نوٹیفکیشن کے مطابق گاڑیوں کی منتقلی کے لیے لازمی نادرا بائیو میٹرک تصدیق کی شرط میں 30 جون 2026 تک توسیع کردی گئی ہے۔نوٹیفکیشن کے مطابق گاڑی خریدنے والے شہری اب 30 جون 2026 تک فروخت کنندہ کی نادرا بائیو میٹرک تصدیق کے بغیر بھی اپنی گاڑی اپنے نام منتقل کرواسکیں گے۔ محکمہ ایکسائز کے حکام کا کہنا ہے کہ اس اقدام کا مقصد شہریوں کو سہولت فراہم کرنا اور گاڑیوں کی منتقلی کے عمل کو آسان بنانا ہے۔محکمہ ایکسائز سندھ کے مطابق اس رعایت سے ایسے شہریوں کو خصوصی سہولت حاصل ہوگی جو مختلف وجوہات کی بنا پر فروخت کنندہ کو بائیو میٹرک تصدیق کے لیے ساتھ لانے میں مشکلات کا سامنا کرتے ہیں۔ حکام نے شہریوں کو ہدایت کی ہے کہ مقررہ مدت کے دوران اپنی گاڑیوں کی منتقلی کے معاملات جلد مکمل کروائیں۔