اسلام آباد (نیوز ڈیسک) مہنگی ایل پی جی سے تنگ عوام کے لیے خوش آئند خبر سامنے آئی ہے، کیونکہ فی کلو ایل پی جی کی قیمت میں نمایاں کمی کر دی گئی ہے۔

تفصیلات کے مطابق ملک بھر میں ایل پی جی 20 روپے فی کلو سستی ہو گئی ہے، جس کے بعد کراچی میں اس کی قیمت کم ہو کر 440 روپے فی کلو تک آ گئی ہے۔ایف پی سی سی آئی کی ایل پی جی اسٹینڈنگ کمیٹی کے کنوینر علی حیدر کا کہنا ہے کہ ایران میں جنگ بندی اور عید و نوروز کی تعطیلات کے بعد سرحدی راستے کھلنے سے ایل پی جی کی فراہمی میں بہتری آئی ہے۔ ان کے مطابق بلوچستان کے سرحدی علاقوں تافتان، 250 بارڈر اور مند کے ذریعے تقریباً 7 ہزار ٹن ایل پی جی ملک میں داخل ہو چکی ہے، جبکہ پورٹ قاسم پر بھی ایک ایل پی جی بردار جہاز پہنچ چکا ہے۔انہوں نے مزید بتایا کہ پاکستان میں استعمال ہونے والی ایل پی جی کا بڑا حصہ درآمدی ہوتا ہے، جس میں زیادہ تر سپلائی ایران سے آتی ہے۔ موجودہ صورتحال میں سپلائی بہتر ہونے کے باعث امکان ظاہر کیا جا رہا ہے کہ آئندہ دنوں میں قیمتوں میں مزید 50 روپے تک کمی ہو سکتی ہے۔

یاد رہے کہ اوگرا کی جانب سے ایل پی جی کی سرکاری قیمت 304 روپے فی کلو مقرر کی گئی تھی، تاہم بعض عناصر اس سے کہیں زیادہ قیمت وصول کر رہے تھے جس کے باعث نرخ 450 سے 470 روپے تک جا پہنچے تھے۔ اب سپلائی میں بہتری کے بعد قیمتوں میں کمی کا رجحان دیکھنے میں آ رہا ہے۔