لاہور (این این آئی)وفاقی حکومت نے 5مرلہ سے بڑے گھروں پر سنگل فیز میٹر لگانے پر پابندی عائد کر دی اور اس حوالے سے نیپرا نے نیو کنکشن کے قوانین میں ترمیم کا نوٹیفکیشن جاری کر دیا ہے۔

ترمیم کے مطابق دو مرلہ کے ڈبل اسٹوری گھر پر کم از کم 3کلوواٹ لوڈ کے لیے سنگل فیز میٹر لگایا جائے گا۔دو مرلہ تک سنگل اسٹوری گھروں کے لیے ایک اعشاریہ پانچ کلوواٹ لوڈ پر کنکشن دیا جائے گا۔دو مرلہ سے زائد اراضی کی صورت میں صارفین کو تھری فیز میٹر لگانے کے لیے ڈیمانڈ نوٹس جاری کیا جائے گا۔لاہور الیکٹرک سپلائی کمپنی (لیسکو)سمیت تمام کمپنیوں میں نئے قوانین پر فوری عملدرآمد شروع کر دیا گیا ہے۔ قبل ازیں گھریلو صارفین کو ایک یا دو کلوواٹ لوڈ پر سنگل فیز میٹر لگانے کی اجازت تھی تاہم ترامیم کے بعد صارفین کو بڑے گھروں میں اب سنگل کی بجائے تھری فیز میٹر لگوانا ہوگا۔تھری فیز میٹر لگوانے والے صارفین پروٹیکٹڈ کیٹیگری کے اہل نہیں رہیں گے، اور اس کی وجہ سے انہیں ٹیرف کے مطابق بجلی کے بل ادا کرنا ہوں گے۔