اسلام آباد (نیوز ڈیسک)مسلم لیگ (ن) کے رہنما خواجہ سعد رفیق نے پیٹرول کی قیمت میں حالیہ کمی کے پس منظر سے پردہ اٹھاتے ہوئے اس حوالے سے اہم نکات بیان کیے ہیں۔
انہوں نے اپنے بیان میں کہا کہ وفاقی حکومت نے پیٹرولیم لیوی میں کمی کر کے ایک ہی روز میں پیٹرول کی قیمت 458 روپے سے کم کر کے 378 روپے فی لیٹر کر دی۔ ان کے مطابق ابتدائی مرحلے میں حکومت نے امریکا اور ایران کے درمیان کشیدگی کے باعث بڑھنے والی قیمتوں کا بوجھ کم کرنے کے لیے سالانہ ترقیاتی پروگرام میں کٹوتی کر کے تقریباً 129 روپے فی لیٹر کا اثر خود برداشت کیا۔خواجہ سعد رفیق کے مطابق وزارت خزانہ نے اس دوران عالمی مالیاتی ادارے (آئی ایم ایف) کو لیوی میں نرمی پر آمادہ کرنے کی کوششیں جاری رکھیں، تاہم ابتدا میں کامیابی حاصل نہ ہو سکی۔ بعد ازاں وزیر اعظم کی براہ راست مداخلت کے بعد آئی ایم ایف ریونیو ہدف میں کمی پر رضامند ہوا، جس کے نتیجے میں پیٹرول پر تقریباً 80 روپے فی لیٹر لیوی کم کرنا ممکن ہو سکا۔انہوں نے مزید بتایا کہ صوبائی حکومتیں بھی ٹرانسپورٹرز کو کرایوں میں زیادہ اضافے سے روکنے کے لیے مختلف ریلیف اقدامات کر رہی ہیں۔
ان کا کہنا تھا کہ عوام کو مہنگائی کے اثرات سے بچانے کے لیے حکومتی کوششیں قابلِ تعریف ہیں، تاہم ضروری ہے کہ اشیائے خورونوش اور دیگر روزمرہ استعمال کی چیزوں کی قیمتوں میں غیر ضروری اضافہ کرنے والوں کے خلاف سخت کارروائی کی جائے۔آخر میں انہوں نے نشاندہی کی کہ موجودہ ڈیزل قیمتوں کے ساتھ زراعت کا شعبہ شدید متاثر ہو رہا ہے، اس لیے حکومت کو چاہیے کہ ڈیزل کی قیمتوں میں توازن پیدا کرنے کے لیے مؤثر حکمت عملی اختیار کرے۔
