اسلام آباد (این این آئی)آئی ایم ایف کے ایگزیکٹو بورڈ کا اجلاس مئی کے پہلے ہفتے میں ہوگا

جس میں پاکستان کیلئے ایک ارب 20 کروڑ ڈالر کی منظوری دی جائیگی، آئی ایم ایف کو دوست ممالک نے قرض کے رول اوور کی یقین دہانی کرا دی ہے۔نجی ٹی وی سے گفتگو کرتے ہوئے وزارت خزانہ حکام نے کہا کہ 7ارب ڈالر کے قرض پروگرام کی اگلی قسط ملنے میں کوئی رکاوٹ نہیں۔ کلائمیٹ فنانسنگ کے آر ایس ایف پروگرام کی 21کروڑ ڈالر کی اگلی قسط بھی ملے گی۔حکام وزارت خزانہ کے مطابق پاکستان نے آئی ایم ایف کی تمام شرائط پوری کر دیں ہیں، آئی ایم ایف کو پیٹرولیم پر ٹارگٹڈ سبسڈی سے متعلق اعتماد میں لیا گیا، تیل کی عالمی قیمتوں میں اضافہ صارفین کو منتقل کرنے سے پہلے فنڈ سے مشاورت کی، ٹارگٹڈ سبسڈی کی رقم موجودہ مالی سال کے بجٹ سے خرچ ہوگی۔ مشکل حالات کیلئے 300ارب کے ہنگامی فنڈز بھی دستیاب ہیں۔حکام کے مطابق سعودی عرب اور یو اے ای کے ڈیپازٹس طویل مدت کیلئے روول اوور کرنے پر بات چیت جاری ہے، آئی ایم ایف کو دوست ممالک کے قرض کے رول اوور کی یقین دہانی کرا دی گئی۔سٹیٹ بینک آف پاکستان میں سعودی عرب کے 5ارب ڈالر کے ڈیپازٹس ہیں، چین کے 4ارب ڈالر اور یو اے ای کے 3ارب ڈالر کے ڈیپازٹس ہیں،

یو اے ای کے 2ارب ڈالر رواں ماہ اور 1ارب ڈالر کی واپسی جولائی میں میچور ہوگی۔وزارت خزانہ کے مطابق پاکستان کو توازن ادائیگی کا فوری مسئلہ درپیش نہیں، ان ڈیپازٹس کے مزید رول اوور کیلئے عرب امارات کی حکومت سے رابطے میں ہیں، یو اے ای پاکستان کے ذمہ قرضہ جلد رول اوور کر دے گا۔