اسلام آباد (نیوز ڈیسک)وزیراعظم کے قومی بچت اور کفایت شعاری پروگرام کے تحت عوام کو ریلیف دینے کے لیے پنجاب میں اہم اقدامات کا آغاز کر دیا گیا ہے،
جن کے تحت پبلک ٹرانسپورٹ کو مفت کرنے کا اعلان کیا گیا ہے۔میڈیا رپورٹس کے مطابق وزیراعلیٰ پنجاب مریم نواز نے صوبے بھر کے شہریوں کے لیے خوشخبری دیتے ہوئے کہا ہے کہ تمام شہروں میں سرکاری ٹرانسپورٹ بغیر کرائے کے دستیاب ہوگی۔ اس فیصلے کے تحت اورنج لائن، میٹرو بس، اسپیڈو اور گرین الیکٹرک بس سروسز میں بھی مفت سفر کی سہولت فراہم کی جائے گی۔اس کے علاوہ حکومت نے کسانوں کی معاونت کے لیے مالی امداد اور ڈیزل پر فی لیٹر 100 روپے سبسڈی دینے کا فیصلہ کیا ہے۔ اسی طرح رجسٹرڈ موٹر سائیکل مالکان کو بھی ہر ماہ 20 لیٹر پیٹرول پر 100 روپے فی لیٹر رعایت دی جائے گی۔وزیراعلیٰ کا کہنا تھا کہ موجودہ معاشی حالات میں حکومت عوام کو ریلیف دینے کے لیے بھرپور اقدامات کر رہی ہے، اور وزیراعظم کی قیادت میں اربوں روپے کا بوجھ برداشت کر کے شہریوں کو سہولت فراہم کی جا رہی ہے۔ انہوں نے کہا کہ مشکل حالات کے باوجود عوام کو تنہا نہیں چھوڑا جائے گا۔
انہوں نے مزید کہا کہ عالمی سطح پر جاری کشیدگی اور مہنگے درآمدی تیل کے باعث پاکستان کو بھی معاشی دباؤ کا سامنا ہے، اس لیے شہریوں کو زیادہ سے زیادہ پبلک ٹرانسپورٹ استعمال کرنے کی ترغیب دی جا رہی ہے، جبکہ حالات بہتر ہونے پر عوامی مشکلات میں مزید کمی لائی جائے گی۔
