اسلام آباد (نیوز ڈ یسک)کویت کی وزارتِ داخلہ نے مختلف اقسام کے وزٹ ویزوں میں ایک ماہ کی اضافی توسیع دینے کا فیصلہ کیا ہے،
جس سے غیر ملکی شہریوں کو عارضی سہولت فراہم کی جائے گی۔میڈیا رپورٹس کے مطابق وزارت کے سیکیورٹی میڈیا کے ڈائریکٹر نے ایک ٹی وی انٹرویو میں بتایا کہ یہ فیصلہ ملک میں موجودہ حالات اور ہوائی اڈے کی وقتی بندش کو مدنظر رکھتے ہوئے کیا گیا ہے۔حکام کا کہنا ہے کہ اس اقدام کا مقصد انسانی بنیادوں پر غیر ملکی افراد اور ان کے کفیلوں کو ممکنہ قانونی پیچیدگیوں سے بچانا ہے۔ مزید یہ کہ کاروباری، خاندانی اور سیاحتی وزٹ ویزوں سمیت تمام متعلقہ ویزوں کی مدت خودکار طور پر بڑھا دی جائے گی۔انہوں نے واضح کیا کہ اس توسیع کے لیے شہریوں کو کسی بھی سرکاری دفتر یا ریزیڈنسی افیئرز ڈیپارٹمنٹ سے رجوع کرنے کی ضرورت نہیں ہوگی، کیونکہ یہ عمل ازخود مکمل کر دیا جائے گا۔
