اسلام آباد (نیوز ڈ یسک) وزیرِ خزانہ محمد اورنگزیب نے پیٹرول اور ڈیزل کی قیمتوں میں اضافے کے فیصلے کا اعلان کرتے ہوئے کہا ہے کہ یہ اقدام اعلیٰ قیادت کی مشاورت سے کیا گیا ہے،

اور اب حکومت عمومی سبسڈی کے بجائے ہدفی (ٹارگٹڈ) سبسڈی کی پالیسی اپنا رہی ہے تاکہ فائدہ براہِ راست مستحق افراد تک پہنچ سکے۔میڈیا رپورٹس کے مطابق انہوں نے بتایا کہ موٹر سائیکل استعمال کرنے والوں کو ہر ماہ 20 لیٹر پیٹرول پر فی لیٹر 100 روپے سبسڈی فراہم کی جائے گی۔ اس کے علاوہ بین الاضلاعی پبلک ٹرانسپورٹ کو ڈیزل پر فی لیٹر 100 روپے رعایت دی جائے گی۔وزیر خزانہ نے مزید کہا کہ مال بردار ٹرکوں اور گڈز ٹرانسپورٹ کے لیے ماہانہ 70 ہزار روپے تک سبسڈی دی جائے گی، جبکہ ریلوے کو بھی حکومتی معاونت فراہم کی جائے گی تاکہ کرایوں میں اضافے کو قابو میں رکھا جا سکے۔

انہوں نے وضاحت کی کہ حکومت اب وسیع پیمانے پر سبسڈی دینے کے بجائے محدود اور مخصوص طبقوں کو سہولت دینے کی حکمت عملی پر عمل کر رہی ہے۔ اس کے ساتھ ساتھ ایندھن کی بچت، بجلی کی پیداواری لاگت میں کمی اور مارکیٹوں کے اوقات کار میں تبدیلی جیسے اقدامات پر بھی غور جاری ہے، اور صوبوں سے مشاورت کے بعد ان فیصلوں کا اعلان کیا جائے گا۔