اسلام آباد (نیوز ڈیسک)قوم سے اپنے خطاب میں وزیر اعظم نے بتایا کہ انہیں پیٹرول کی قیمت میں 95 روپے فی لیٹر اور ڈیزل میں 203 روپے فی لیٹر اضافے کی سفارش دی گئی تھی،

تاہم انہوں نے یہ تجویز مسترد کر دی۔ ان کے مطابق حکومت نے عوام کو ریلیف دینے کے لیے اس ہفتے مزید 56 ارب روپے کا مالی بوجھ خود برداشت کرنے کا فیصلہ کیا ہے۔وزیر اعظم کا کہنا تھا کہ موجودہ حالات کے مطابق پیٹرول کی قیمت 544 روپے فی لیٹر تک پہنچ سکتی تھی، لیکن حکومت اسے 322 روپے میں فراہم کر رہی ہے۔ اسی طرح ڈیزل کی ممکنہ قیمت 790 روپے فی لیٹر بنتی تھی، جبکہ اسے 335 روپے میں دستیاب رکھا گیا ہے۔

اپنے خطاب میں انہوں نے اس عزم کا اعادہ کیا کہ حکومت توانائی کے شعبے میں بہتری کے لیے اقدامات جاری رکھے گی اور مارکیٹ میں استحکام برقرار رکھنے کے لیے مؤثر حکمت عملی اپنائی جائے گی۔ انہوں نے واضح کیا کہ پیٹرولیم مصنوعات کی قیمتوں کو موجودہ سطح پر برقرار رکھنے کا فیصلہ عوامی ریلیف اور معاشی استحکام کو مدنظر رکھ کر کیا گیا ہے۔