اسلام آباد (نیوز ڈیسک): پاکستان ٹیلی کمیونیکیشن اتھارٹی (پی ٹی اے) نے ٹیلی نار پاکستان اور یوفون کے مجوزہ انضمام کو تکنیکی سطح پر منظوری دے دی ہے، جس کے بعد اس عمل میں اہم پیش رفت سامنے آئی ہے۔

ذرائع کے مطابق پاکستان ٹیلی کمیونیکیشن کمپنی لمیٹڈ (پی ٹی سی ایل)، جو اس ڈیل کی پیرنٹ کمپنی ہے، جلد ہی اس حوالے سے پاکستان اسٹاک ایکسچینج کو باقاعدہ آگاہ کرے گی۔ تاہم انضمام کو حتمی شکل دینے کے لیے اسلام آباد ہائی کورٹ سے قانونی منظوری حاصل کرنا ابھی باقی ہے، جس کے مکمل ہونے میں تقریباً چار ہفتے لگنے کا امکان ظاہر کیا جا رہا ہے۔ماہرین کا کہنا ہے کہ انضمام کے بعد بننے والی نئی کمپنی کے صارفین کی تعداد تقریباً 7 کروڑ 20 لاکھ تک پہنچ جائے گی، جس سے یہ ادارہ مارکیٹ میں ایک مضبوط حریف کے طور پر سامنے آئے گا۔

اس عمل کے تحت دونوں کمپنیوں کے نیٹ ورکس کو آپس میں ضم کیا جائے گا تاکہ سروس کوریج کو بہتر بنایا جا سکے، جبکہ اخراجات کم کرنے کے لیے موبائل ٹاورز کی تعداد کو بھی متوازن بنایا جائے گا۔ابتدائی مرحلے میں کچھ صارفین کے دیگر کمپنیوں کی جانب منتقل ہونے کا امکان موجود ہے، تاہم طویل مدت میں یہ انضمام پاکستان کی ٹیلی کام مارکیٹ کی مسابقتی صورتحال کو نمایاں طور پر تبدیل کر سکتا ہے۔