لاہور( این این آئی)حکومت کی جانب سے بجلی کے بلوں میں اضافی فکسڈ چارجز شامل کر دئیے ہیں جن کی وصولی فروری کے بلوں میں شروع کر دی گئی ہے۔

فکسڈ چارجز پروٹیکٹڈ اور نان پروٹیکٹڈ دونوں اقسام کے صارفین پر عائد کیے گئے ہیں۔ پروٹیکٹڈ صارفین کے لیے ماہانہ 100یونٹ استعمال پر 200روپے جبکہ 200یونٹ استعمال کرنے والوں پر 300روپے ماہانہ فکسڈ چارجز مقرر کیے گئے ہیں۔اسی طرح نان پروٹیکٹڈ صارفین کے لیے 100یونٹ تک استعمال پر 275روپے ماہانہ فکسڈ چارجز وصول کیے جا رہے ہیں جبکہ 200یونٹ تک کے صارفین پر 300روپے چارجز عائد کیے گئے ہیں۔مزید برآں 300یونٹ تک بجلی استعمال کرنے والے نان پروٹیکٹڈ صارفین سے 350روپے، 400یونٹ تک صارفین سے 400روپے جبکہ 500یونٹ استعمال کرنے والوں کے لیے فکسڈ چارجز بڑھا کر 500 روپے کر دئیے گئے ہیں۔حکام کے مطابق 600یونٹ تک بجلی استعمال کرنے والے صارفین کے لیے فکسڈ چارجز میں اضافے کے بعد یہ 675روپے ماہانہ کر دیے گئے ہیں۔