اسلام آباد (نیوز ڈیسک)عالمی مارکیٹ میں قیمتوں کے اتار چڑھاؤ کے باوجود پاکستان میں ایندھن کی فراہمی مستحکم اور تسلی بخش قرار دی گئی ہے۔
وزیر خزانہ محمد اورنگزیب کی سربراہی میں پیٹرولیم مصنوعات کی قیمتوں اور دستیابی کا جائزہ لینے کے لیے ایک اہم اجلاس منعقد ہوا، جس میں حکام نے بتایا کہ ملک میں ڈیزل کے ذخائر تقریباً 24 دن کے لیے کافی ہیں جبکہ پیٹرول بھی مناسب مقدار میں دستیاب ہے۔اجلاس کے دوران آگاہ کیا گیا کہ خام تیل سے بھرا ایک جہاز کراچی پہنچ چکا ہے اور دوسرا جلد پہنچنے والا ہے، جبکہ مارچ اور اپریل کے لیے مزید درآمدات کے انتظامات بھی جاری ہیں۔وزیر خزانہ نے اس موقع پر ہدایت کی کہ عوام پر اضافی بوجھ ڈالے بغیر ایندھن کی بلا تعطل فراہمی یقینی بنائی جائے، ساتھ ہی مارکیٹ کی صورتحال اور سپلائی چین کی روزانہ بنیادوں پر نگرانی جاری رکھنے پر زور دیا۔اعلامیے کے مطابق ایندھن کی مصنوعی قلت روکنے کے لیے سخت اقدامات کیے جائیں گے اور صوبائی حکومتوں کو ذخیرہ اندوزی کے خلاف کارروائی کی ہدایت بھی دی گئی ہے۔
حکام نے یقین دہانی کرائی کہ آئل مارکیٹنگ کمپنیاں معمول کے مطابق کام جاری رکھیں گی اور کسی قسم کی قلت کا خدشہ نہیں۔ مزید برآں، ایندھن کے ذخائر کی نگرانی کے لیے ڈیجیٹل ڈیش بورڈ متعارف کرانے کا فیصلہ کیا گیا ہے، جبکہ توانائی کے ذرائع کو متنوع بنانے کے لیے بین الاقوامی سطح پر روابط بڑھانے پر بھی غور کیا گیا۔
