کراچی (نیوز ڈیسک): ایران کے قونصل جنرل اکبر عیسیٰ زادے نے واضح کیا ہے کہ آبنائے ہرمز پاکستانی بحری جہازوں کے لیے بدستور کھلی ہے اور وہ اس راستے سے آمد و رفت جاری رکھ سکتے ہیں۔

جیو نیوز کو دیے گئے انٹرویو میں انہوں نے کہا کہ خام تیل یا گیس لے جانے والے جہاز اگر ایرانی حکام سے رابطہ کریں تو انہیں اس اہم سمندری گزرگاہ سے گزرنے کی اجازت دی جا سکتی ہے۔ ان کے مطابق پاکستان کے علاوہ دیگر کئی ممالک کے جہاز بھی اس سہولت سے فائدہ اٹھا رہے ہیں۔ایرانی قونصل جنرل کا کہنا تھا کہ یہ پابندی صرف امریکا، اسرائیل اور ان کے اتحادیوں تک محدود ہے، جبکہ دیگر ممالک کے لیے یہ راستہ کھلا رکھا گیا ہے۔ انہوں نے مزید کہا کہ جو ممالک جارحانہ کارروائیوں میں شامل نہیں، ان کے لیے آبنائے ہرمز بین الاقوامی تجارت کے لیے دستیاب ہے۔

ادھر ایک رپورٹ کے مطابق پاکستانی پرچم بردار آئل ٹینکر “کراچی” حال ہی میں آبنائے ہرمز عبور کرتے ہوئے ایران کے ساحل کے قریب سے گزرا۔ یہ جہاز ایرانی جزائر لارک اور قشم کے درمیان ایک تنگ سمندری راستے سے ہوتا ہوا خلیج عمان کی جانب روانہ ہوا۔ بتایا جا رہا ہے کہ اس ٹینکر میں 8 کروڑ لیٹر سے زائد تیل موجود ہے۔