لاہور (این این آئی) لاہور الیکٹرک سپلائی کمپنی (لیسکو) نے اے ایم آئی سمارٹ سنگل فیز میٹرز کی مارکیٹ سے خریداری پر پابندی عائد کر دی اور میٹر کے لیے نئی قیمتیں اور قواعد و ضوابط بھی جاری کر دیئے ہیں۔

ذرائع کے مطابق، لیسکو نے سنگل فیز میٹر کی قیمت 11,666روپے مقرر کر دی ہے جبکہ میٹر کی قیمت کے علاوہ صارفین کو سکیورٹی چارجز علیحدہ ادا کرنے ہوں گے۔ سکیورٹی چارجز کا ڈیمانڈ نوٹس صارف کے لوڈ کے مطابق جاری کیا جائے گا۔کمپنی کو اے ایم آئی سمارٹ سنگل فیز میٹر کا سٹاک ملنے پر خریداری پر پابندی عائد کر دی گئی ہے۔ اس سے قبل میٹرز کا سٹاک نہ ہونے کی وجہ سے خریداری کا عمل آٹ سورس کر دیا گیا تھا، جس کے دوران لیسکو نے بہت کم صارفین کو این او سی جاری کیے تھے۔

صارفین نے این او سی کی بنیاد پر میٹر لے کر کنکشن حاصل کیے۔ذرائع کا کہنا ہے کہ نئی پابندی اور قیمتوں کے نفاذ کا مقصد صارفین کو میٹر کی شفاف دستیابی اور سکیورٹی چارجز کی مناسب تقسیم کو یقینی بنانا ہے۔ صارفین سے اپیل کی گئی ہے کہ وہ نئی ہدایات کے مطابق ہی میٹر کی خریداری کریں اور غیر قانونی ذرائع سے خریداری سے گریز کریں۔