کراچی(این این آئی)وزیراعظم شہباز شریف کی ہدایت پر روشن ڈیجیٹل اکائونٹ اسکیم کا دائرہ کار بڑھانے کا فیصلہ کرلیا گیا ہے۔

وزارت خزانہ کے مطابق روشن ڈیجیٹل اکائونٹ اب غیرملکی شہریوں، ادارہ جاتی سرمایہ کاروں کے لیے بھی کھلے گا، غیرملکی کمپنیوں کو حکومتی سیکیورٹیز، نیا پاکستان سرٹیفکیٹ میں سرمایہ کاری کی اجازت ہوگی۔وزیر خزانہ محمد اورنگزیب نے عالمی سرمایہ کاروں کو پاکستان میں سرمایہ کاری کی دعوت بھی دی ہے۔وزارت خزانہ نے کہا کہ روشن ڈیجیٹل اکانٹ میں اب تک 9 لاکھ سے زائد اکانٹس کھل چکے ہیں، آر ڈی اے کے ذریعے پاکستان میں 12 ارب ڈالر سے زائد سرمایہ آچکا ہے۔مالی سال 2025 میں ترسیلات زر 38.3 ارب ڈالر تک پہنچ گئیں، رواں مالی سال ترسیلات زر 42 ارب ڈالر تک پہنچنے کی توقع ہے۔

وزارت خزانہ نے کہا کہ اسٹیٹ بینک کے پاس زرمبادلہ ذخائر تقریبا 16.3 ارب ڈالر ہیں، پاکستان کے مجموعی زرمبادلہ ذخائر 31.6 ارب ڈالر کے قریب ہیں۔روشن ڈیجیٹل اکائونٹ کا آغاز اسٹیٹ بینک نے 10 ستمبر 2020 کو کیا تھا جس کا مقصد مالیاتی منڈیوں کے ساتھ پاکستان کا مضبوط رابطہ بڑھانا ہے۔