اسلام آباد (نیوز ڈیسک) عالمی منڈی میں خام تیل کی قیمتوں میں ایک بار پھر اضافہ ریکارڈ کیا گیا ہے جس کے باعث توانائی کے بحران سے متعلق خدشات بھی بڑھنے لگے ہیں۔
میڈیا رپورٹس کے مطابق امریکی خام تیل کی قیمت میں تقریباً 0.88 فیصد اضافہ ہوا ہے جس کے بعد اس کی قیمت 99 ڈالر فی بیرل سے تجاوز کر گئی ہے۔ اسی طرح برطانوی خام تیل کی قیمت میں بھی تقریباً 1.5 فیصد اضافہ دیکھا گیا ہے اور یہ 104 ڈالر فی بیرل کے قریب فروخت ہو رہا ہے۔امریکی اخبار کی ایک رپورٹ میں بتایا گیا ہے کہ آئل انڈسٹری نے ٹرمپ انتظامیہ کو خبردار کیا ہے کہ اگر موجودہ صورتحال برقرار رہی تو توانائی کا عالمی بحران مزید سنگین شکل اختیار کر سکتا ہے۔تیل کمپنیوں کے مطابق آبنائے ہرمز کی ممکنہ بندش عالمی سطح پر تیل کی ترسیل اور قیمتوں کو بری طرح متاثر کر سکتی ہے، کیونکہ دنیا کی بڑی مقدار میں تیل اسی راستے سے گزرتا ہے۔
ادھر اطلاعات ہیں کہ آبنائے ہرمز کو کھلا رکھنے کے لیے سابق امریکی صدر ڈونلڈ ٹرمپ کی اپیل پر عالمی برادری کی جانب سے فوری ردعمل سامنے نہیں آیا، جبکہ جاپان نے بھی اس خطے میں اپنے جنگی بحری جہاز بھیجنے سے انکار کر دیا ہے۔
