اسلام آباد (نیوز ڈ یسک) نیشنل ڈیٹا بیس اینڈ رجسٹریشن اتھارٹی (نادرا) نے اپنی ایک جعلی ویب سائٹ سامنے آنے پر شہریوں کو خبردار کرتے ہوئے اہم ہدایات جاری کی ہیں۔

نادرا کی جانب سے جاری اعلامیے میں بتایا گیا ہے کہ ادارے کے ویزا پورٹل کی نقل پر مبنی ایک مشکوک ویب سائٹ سامنے آئی ہے جس کا لنک https://www.visa.nadragov.online ہے۔ حکام کے مطابق یہ ویب سائٹ نادرا کی سرکاری ویب سائٹ نہیں ہے اور اس کا ادارے سے کوئی تعلق نہیں۔ترجمان نادرا کا کہنا ہے کہ خدشہ ہے کہ اس جعلی ویب سائٹ کو شہریوں کی ذاتی معلومات یا آن لائن ادائیگیاں حاصل کرنے کے لیے استعمال کیا جا رہا ہو۔

ادارے نے عوام کو ہدایت کی ہے کہ وہ اس ویب سائٹ کو استعمال نہ کریں اور نہ ہی اس پر اپنی کوئی ذاتی معلومات درج کریں۔ نادرا کے مطابق ویزا سے متعلق خدمات کے لیے صرف سرکاری پورٹل https://visa.nadra.gov.pk استعمال کیا جائے۔

نادرا نے مزید واضح کیا کہ شہری ہمیشہ اس بات کو یقینی بنائیں کہ نادرا کی تمام آن لائن خدمات صرف ان ویب سائٹس کے ذریعے حاصل کی جائیں جن کے آخر میں .gov.pk موجود ہو۔