اسلام آباد (نیوز ڈیسک)حکومت کی جانب سے اخراجات میں کمی کی پالیسی کے تحت پاسپورٹ دفاتر کے اوقات کار میں تبدیلی کا اعلان کر دیا گیا ہے۔

میڈیا رپورٹس کے مطابق ڈائریکٹوریٹ جنرل امیگریشن اینڈ پاسپورٹس نے نیا شیڈول جاری کر دیا ہے، جس کے تحت اب پاسپورٹ دفاتر ہفتے میں چار دن کام کریں گے۔جاری کردہ سرکلر میں بتایا گیا ہے کہ پاسپورٹ دفاتر پیر سے جمعرات تک کھلے رہیں گے جبکہ باقی دنوں میں دفاتر بند رہیں گے۔ تاہم وہ ریجنل پاسپورٹ دفاتر جو 24 گھنٹے خدمات فراہم کرتے ہیں، اپنے معمول کے مطابق کام جاری رکھیں گے۔سرکلر کے مطابق اسلام آباد کے آسان خدمت سینٹر میں بھی پہلے کی طرح شفٹ سسٹم برقرار رکھا جائے گا تاکہ شہریوں کو سہولت فراہم کی جا سکے۔

یہ نیا شیڈول ڈائریکٹر جنرل امیگریشن اینڈ پاسپورٹس کی منظوری کے بعد نافذ کیا گیا ہے۔

واضح رہے کہ حکومت کی کفایت شعاری مہم کے تحت دیگر شعبوں میں بھی اقدامات کیے جا رہے ہیں۔ اسی سلسلے میں تعلیمی اداروں کو 16 سے 31 مارچ تک بند رکھنے کا فیصلہ کیا گیا ہے، جبکہ سرکاری اور نجی دفاتر کے اوقات کار میں بھی تبدیلی کی گئی ہے۔ مزید برآں سرکاری افسران کے لیے فراہم کیے جانے والے ایندھن کے استعمال میں بھی کمی کر دی گئی ہے۔