اسلام آباد (نیوز ڈ یسک) وفاقی حکومت نے توانائی کی بچت اور اخراجات میں کمی کے لیے ہفتہ وار ایک اضافی تعطیل دینے سے متعلق اہم فیصلہ کر لیا ہے۔
وزیراعظم شہباز شریف کی زیر صدارت کفایت شعاری اور توانائی کے مؤثر استعمال سے متعلق اقدامات کا جائزہ لینے کے لیے اجلاس منعقد ہوا۔ اجلاس کے بعد جاری اعلامیے میں بتایا گیا کہ ہفتے میں اضافی تعطیل جمعہ کے روز دینے کا فیصلہ کیا گیا ہے۔اعلامیے کے مطابق وزیراعظم نے اس موقع پر کہا کہ حکومت کی کوشش ہے کہ عالمی حالات کے باوجود ملکی معیشت کو مستحکم رکھا جائے۔ انہوں نے مزید بتایا کہ اعلان کردہ اقدامات پر عمل درآمد کی نگرانی کے لیے نائب وزیراعظم اسحاق ڈار کی سربراہی میں ایک خصوصی کمیٹی قائم کر دی گئی ہے جو روزانہ کی بنیاد پر پیش رفت کا جائزہ لے کر اپنی رپورٹ پیش کرے گی۔وزیراعظم نے ہدایت دی کہ کفایت شعاری کے تحت کیے جانے والے اقدامات کا تھرڈ پارٹی آڈٹ بھی کرایا جائے تاکہ ان کے حقیقی نتائج اور اثرات کا درست اندازہ لگایا جا سکے۔انہوں نے وفاقی وزارتوں اور ڈویژنز کو ہدایت جاری کی کہ وہ ان اقدامات پر مکمل طور پر عمل درآمد یقینی بنائیں۔
شہباز شریف نے یہ بھی کہا کہ کفایت شعاری مہم کے تحت بند کی جانے والی سرکاری گاڑیوں کی تصاویر کابینہ ڈویژن کو فراہم کی جائیں۔مزید برآں ورک فرام ہوم کے نظام کو مؤثر بنانے کے لیے تمام وزارتوں کو ہدایت دی گئی ہے کہ وہ اس حوالے سے اپنی تفصیلی رپورٹ وزیراعظم آفس کو ارسال کریں۔
