اسلام آباد (نیوز ڈ یسک)عید الفطر سے قبل سرکاری ملازمین کے لیے خوشخبری سامنے آئی ہے، کیونکہ خیبرپختونخوا اور پنجاب کی حکومتوں نے ملازمین کو تنخواہیں اور پنشن عید سے پہلے ادا کرنے کا فیصلہ کر لیا ہے۔

خیبرپختونخوا حکومت کی جانب سے جاری اعلامیے کے مطابق صوبے کے سرکاری ملازمین اور پنشنرز کو ان کی تنخواہیں اور پنشن 16 مارچ تک ادا کر دی جائیں گی تاکہ وہ عید کی تیاریوں کے لیے بروقت مالی سہولت حاصل کر سکیں۔دوسری جانب پنجاب حکومت نے بھی عید الفطر کے پیش نظر سرکاری ملازمین اور پنشنرز کو ریلیف دینے کے لیے تنخواہوں اور پنشن کی قبل از وقت ادائیگی کا اعلان کیا ہے۔ اس مقصد کے لیے محکمہ خزانہ پنجاب نے باقاعدہ نوٹیفکیشن جاری کر دیا ہے۔نوٹیفکیشن کے مطابق پنجاب کے تمام سرکاری ملازمین کو رواں ماہ کی تنخواہ 16 مارچ کو ادا کی جائے گی تاکہ وہ عید کی خریداری اور دیگر اخراجات بآسانی پورے کر سکیں۔

حکومت کی جانب سے یہ بھی واضح کیا گیا ہے کہ پنشنرز کو بھی اسی تاریخ یعنی 16 مارچ کو پنشن جاری کر دی جائے گی، تاکہ ریٹائرڈ افراد کو بھی عید سے قبل مالی مشکلات کا سامنا نہ کرنا پڑے۔