کراچی(این این آئی)ملک بھر میں پیٹرولیم مصنوعات کی فراہمی متاثر ہونے کا خدشہ ہے اور اس حوالے سے آئل مارکیٹنگ ایسوسی ایشن نے خط کے ذریعے حکومت کو خبردار کر دیا۔

آئل مارکیٹنگ ایسوسی ایشن کی جانب سے لکھے گئے خط میں مقامی ریفائنریز کی وعدوں سے انحراف پر شدید تشویش کا اظہار کیا گیا۔ ایسوسی ایشن نے کہا کہ صورتحال درست نہ کی گئی تو ایندھن کی فراہمی متاثر ہو سکتی ہے، پروڈکٹ جائزہ اجلاس میں طے شدہ مقدار کے مطابق سپلائی نہیں دی گئی، آئل مارکیٹنگ کمپنیوں نے اسی یقین دہانی پر اپنی منصوبہ بندی کی تھی۔چیئرمین آئل مارکیٹنگ کمپنیز طارق وزیر علی نے خط میں لکھا کہ بیشتر کمپنیوں نے درآمدی کارگو منگوانے کا انتظام نہیں کیا تھا، ان کو امید تھی کہ مقامی ریفائنریز طے شدہ مقدار فراہم کریں گی لیکن ریفائنریز نے اچانک نیا تقسیم نظام متعارف کروا دیا۔طارق وزیر علی نے مزید لکھا کہ نئے نظام کے تحت کمپنیوں کو کم مقدار میں مصنوعات فراہم کی جا رہی ہیں، فوری متبادل سپلائی کے ذرائع بھی اس وقت دستیاب نہیں، مناسب ذخیرہ ہونے کے باوجود ریفائنریز کم سپلائی دے رہی ہیں۔

چیئرمین آئل مارکیٹنگ کمپنیز کے مطابق لازمی 21 دن کا ایندھن ذخیرہ تیزی سے کم ہو رہا ہے، سپلائی کم ہونے سے آئندہ دنوں میں ایندھن کا ذخیرہ خطرناک حد تک کم ہو سکتا ہے، قلت کی صورت میں قانونی ذمہ داری ریفائنریز اور نگران ادارے پر ہوگی۔