اسلام آباد (نیوز ڈ یسک)سندھ ہائی کورٹ نے پاکستان انٹرنیشنل ایئرلائن (پی آئی اے) کے ریٹائرڈ ملازمین کے حق میں اہم فیصلہ سناتے ہوئے ان کی طبی سہولتیں فوری طور پر بحال کرنے کا حکم دے دیا۔

عدالت نے ہدایت کی کہ آئندہ سماعت تک درخواست گزاروں کو بلا رکاوٹ علاج کی سہولت فراہم کی جائے۔یہ درخواست ایئر لیگ کے رہنما شمیم اکمل اور دیگر کی جانب سے دائر کی گئی تھی، جس میں مؤقف اختیار کیا گیا کہ قومی ایئرلائن کو پبلک لمیٹڈ کمپنی میں تبدیل کیے جانے کے بعد اس کے اثاثے اور واجبات ایک ہولڈنگ کمپنی کو منتقل کر دیے گئے۔ درخواست گزاروں کے وکیل نے عدالت کو بتایا کہ انتظامیہ نے ریٹائرڈ ملازمین کی طبی سہولتیں State Life Insurance Corporation کے سپرد کر دی ہیں۔وکیل کے مطابق یہ اقدام PIA Corporation Act 2016 سے متصادم ہے۔ ان کا کہنا تھا کہ نئے معاہدے کے تحت پنشنرز کو مخصوص اسپتالوں اور ادویات تک محدود کر دیا گیا، جو ان کے حقوق کے منافی ہے۔عدالت نے متعلقہ فریقین کو نوٹس جاری کرتے ہوئے جواب طلب کر لیا اور مزید کارروائی کے لیے کیس کی سماعت چار ہفتوں کے لیے ملتوی کر دی۔