اسلام آباد (نیوز ڈیسک) سونے اور چاندی کی قیمتوں میں مسلسل سات دن تک اضافے کے بعد آج پہلی مرتبہ کمی ریکارڈ کی گئی ہے، جس سے مقامی صرافہ مارکیٹ میں قدرے ریلیف دیکھنے میں آیا۔

آل پاکستان صرافہ جیمز اینڈ جیولرز ایسوسی ایشن کے جاری کردہ اعداد و شمار کے مطابق فی تولہ سونا 700 روپے کم ہو کر 5 لاکھ 40 ہزار 562 روپے کی سطح پر آ گیا ہے۔ اسی طرح 10 گرام سونے کی قیمت میں 600 روپے کی کمی ہوئی جس کے بعد یہ 4 لاکھ 63 ہزار 444 روپے ہو گئی۔

چاندی کی قیمت میں بھی نمایاں کمی دیکھی گئی اور فی تولہ چاندی 350 روپے سستی ہو کر 9 ہزار 204 روپے تک آ گئی۔ عالمی منڈی میں بھی سونے کے نرخ نیچے آئے جہاں فی اونس قیمت 7 ڈالر کمی کے بعد 5 ہزار 178 ڈالر ریکارڈ کی گئی۔