اسلام آ باد (نیوز ڈ یسک) پاکستان ٹیلی کمیونیکیشن اتھارٹی (پی ٹی اے) نے صارفین کی رہنمائی اور سہولت کے لیے ایک نیا ڈیجیٹل اسسٹنٹ متعارف کرا دیا ہے۔

ادارے کی جانب سے جاری اعلامیے کے مطابق یہ ڈیجیٹل اسسٹنٹ ٹیلی کمیونیکیشن سروسز اور شکایات درج کرانے کے طریقہ کار سے متعلق بنیادی معلومات فراہم کرے گا۔ صارفین اس سہولت سے واٹس ایپ نمبر 03150055055 کے ذریعے استفادہ کر سکتے ہیں۔بیان میں مزید بتایا گیا کہ یہ سروس مینو بیسڈ آپشنز پر مشتمل ہے، جس کے ذریعے صارفین اپنی ضرورت کے مطابق متعلقہ معلومات فوری طور پر حاصل کر سکیں گے۔ سسٹم مخصوص کمانڈز پر خودکار انداز میں جواب دیتا ہے، جس سے تیز اور مؤثر رابطہ ممکن بنایا گیا ہے۔

پی ٹی اے کے مطابق اس اقدام کا مقصد صارفین کو بہتر خدمات فراہم کرنا، ریگولیٹری معلومات تک رسائی کو آسان بنانا اور سوالات کے بروقت جوابات یقینی بنانا ہے تاکہ جدید ڈیجیٹل ٹیکنالوجی کے استعمال سے سہولیات کو مزید مؤثر بنایا جا سکے۔