اسلام آباد (نیوز ڈیسک) — دنیا بھر میں ماہِ رمضان عقیدت و احترام کے ساتھ منایا جا رہا ہے،

اسی دوران کویت میں شہریوں کو عبادات اور خاندانی مصروفیات کے لیے مسلسل چار دن کی تعطیلات میسر آ گئی ہیں۔عرب ذرائع ابلاغ کے مطابق کویت کی حکومت نے قومی دن اور یومِ آزادی کے موقع پر 25 اور 26 فروری، بدھ اور جمعرات، کو سرکاری چھٹیوں کا اعلان کیا ہے۔ یہ فیصلہ کابینہ کے باقاعدہ اجلاس میں کیا گیا جس کی سربراہی وزیر اعظم شیخ احمد العبداللہ الصباح نے کی۔واضح رہے کہ کویت میں ہفتہ وار تعطیل جمعہ اور ہفتہ کو ہوتی ہے، اس طرح بدھ سے ہفتہ تک چار روزہ وقفہ بن گیا ہے جس سے شہریوں کو طویل آرام کا موقع مل گیا۔اعلامیے کے مطابق ان دو دنوں میں تمام وزارتیں، سرکاری محکمے اور پبلک اتھارٹیز بند رہیں گی، جبکہ سرکاری دفاتر اتوار یکم مارچ سے دوبارہ معمول کے مطابق کام شروع کریں گے۔

البتہ وہ ادارے جہاں خدمات کا تسلسل ناگزیر ہے، وہاں عوامی ضرورت کے پیش نظر خصوصی انتظامات کیے جائیں گے تاکہ اہم امور متاثر نہ ہوں۔

یہ تعطیلات ہر سال ملک میں قومی شناخت اور آزادی کی یاد تازہ کرنے کے لیے منائی جاتی ہیں، اور پورے ملک میں ان ایام کو جوش و خروش کے ساتھ منایا جاتا ہے۔